Tradisaun eransa husi beiala sira
Halo ami jerasaun foun la hatene rai
Eransa ho karakter sosialista
Halo ami senti maun no alin nafatin
Laiha ida senti riku liu no kiak liu
Iha tempu koalia lia moris ka lia mate
Sempre unidus no firme nafatin
Hodi lolo liman ba malu no tulun malu
Maske todan iha kbaas senti sai kamaan
Tamba iha fetosan umane barak
Mak sempre suporta malu
Hodi finaliza no finansia eventu nee
La’os iha lia moris ka lia mate deit
Maibe sai mos tribunal eransa ida
Hodi solusiona problema hotu
Nebe komete husi parte hotu iha uma lisan ida
Lisan beiala sira sai sasukat ba jerasaun foun
Labele sai egoista hodi hanoin nia-an deit
Jerasaun foun tenki kaer metin banati tuir nafatin
Eransa tradisaun sosialista beiala sira nian
Tamba husi eransa tradisaun sosialista ne’e
Mak sei hatudu o nia orijinalidade
Labele haluha-an hanesan malae mutin husi tasi balun
Nebe sem tradisaun no lisan laek
Hodi hanoin deit nia-an no sai egoista
Husi lisan no eransa tradisaun sosialista
Mak hatudu identidade Timor ba mundo
By Aldo Jlm’21