Fuat suco ida ne’ebe nia populasaun uitoan liu entre suco neen sira iha Iliomar hanesan Iliomar I, Iliomar II, Ailebere, Tirilolo no Caenlio. Uluk iha tempu Portugues barak uitoan to’o atus valu resin, maybe mai to’o iha invasaun Indonesia durante 24 anos, numero populasaun tu’un makaas loos, redus to’o kuaze metade husi atus walu, mai atus haat deit, tamba konsekuensia funu.
Husi ne’e mak ninia juventude sira mos menus, wainhira iha kompetisaun ruma hanesan loron bo’ot Independensia Indonesia nian iha 17 agustus no loron bo’ot sira seluk iha tempu Indonesia nian atu ba kompete ho suco seluk. Maibe jogadores sira atu ba kompete laiha, nebe tenki ba empresta tun sa’e iha fatin seluk hanesan mai empresta fali jogador balun husi Lospalos atu ba apoio klube foinsa’e ka juventude desportivu Fuat nian.
Maibe rezultadu husi referendum 30 de Agosto 1999 Timor Leste ikus mai independente, no iha tinan 1999 ema halai ba ailaran aproveita tempo apertadu ida ne’e, jovem barak mak halai hamutuk no ikus mai hola malu, no to’o agora número populasaun mos aumenta fali ona, husi atus haat resin agora sae fali ona ba atus hitu ou atus valu resin.
Nune’e juventude sira husi suco Fuat ne’e mos aumenta barak ona, no husi sira ne’e bele forma grupu 2 to’o 4 hodi hasoru grupu sira husi suco seluk ne’ebe existi iha postu administrativu Iliomar. Husi Komisaun Organizadora ba loron bo’ot 28 novembro 2021 nian nebe realiza duni iha Suco Fuat posto administrativu Iliomar, ho modalidade hanesan, bola voley feto no mane, futebol mane deit.
Rezultadu husi kompetisaun ne’e, juventude mane team bola voley grupu A hetan 1o klasifikadu iha final hasoru team husi Ailebere, nune’e mos ho tebe bola mane hetan 1o klasifikadu hasoru team husi Ailebere hotu ho rezultadu final 3-2.
Nune’e mos husi team bola voley feto hetan 2o klasifikadu hasoru team husi Kaidabu. Primeiru klasifikadu hetan premiu osan U$400, no segundo klasifikadu hetan premiu osan U$300. Jogu ne’e rasik organiza husi Komisaun Organizadora Posto Administrativu Iliomar hahu husi dia 9 dezembru 2021 no termina iha 31 dezembru 2021 mak foin final maibe altera fali, tamba iha problema, nune’e final realiza fali iha dia 3 de janeiro de 2022.
Husi rezultadu ne’e hatudu katak maski uluk sira falta atleta atu tuir kompetisaun hodi empresta tun sa’e, maibe graças a Deus, Na’i haraik bensa wain ba sira hodi buras liu tan, hanesan fitun iha lalehan no raihenek iha tasi-ibun, nune’e rezultadu final husi kompetisaun sira ne’e agora iha fali ona sira nia liman.
Hanesan iha biblia dehan, “Belem o rai ida kiik, maibe o nia naran sei sai bo’ot iha mundu raiklaran”, nune’e mos FUAT (Forsa Unidade Atinji Tiha ona), o suco ida ne’ebe kiik no kiak liu, maibe o nia naran boot iha rai Iliomar no municipio Lautém. Juventude desportivu Fuat uluk nunka manan tamba nia jogadores sira mesak empresta deit, sira tuir kompetisaun para hodi harame deit, maibe tempu to’o ona hodi hatudu o nia kbi’it no forsa para ema hotu hatene katak, maski o kiik maibe o forte no bele iha área deportivu no área sira seluk.
By Aldo Jlm’22 (Edisi 28/6/2022)