Aman S. José Liurai David nia oan
Hori uluk kedas Na’i fihir kedas ona o
Atu sai protetor no parseiru Na’i feto nian
Sai Salvador husi Nai nia Salvador be atu mai salva mundo
Aman S. José aman virtude rona nain
Aman ejekutador Na’i nia anjo nian
Aman virtude humildade ka haraik-an nian
Hodi halo tuir deit Nai nia anjo haruka atu halo
Aman S. José, aman hakiak Na’i Jesus
Aman ida ne’ebe nakonu ho Na’i nia domin
Bali familia Nazare iha o nia moris tomak
Ho responsabilidade tuir Na’i nia hakarak
Aman S. José aman domin na’in
Ho domin ita-bo’ot harí no bali familia Nazaré
Familia ida ne’ebe nakonu ho Nai nia grasa no domin
Tau matan no bali sira na’in rua tuir ita nia abilidade badaen nian
Husi o ami aprende buat barak, silêncio, rona, haraik-an no halo tuir
Na’i nia bolu, hodi rona didiak no ejekuta kedas iha tempu ne’eba
Maski iha tentasaun oi-oin husi Herodes nebe hakarak atu oho Nai Jesus
Ita-bo’ot se tilun ba Nai nia lian no ejekuta kedas hodi proteje sira rua
Iha funu laran momentu difisil ami sarani diocese Baucau
Hili ita-boot sai ami nia mahein diocese nian
Hodi proteje no bali diocese ne’e durante tinan 25 nian laran
Buras no matak hanesan jardim Edem be uluk Adão no Eva hela ba
Diocese ne’ebe harii husi matebian Amo Bispo D.Basilio iha tinan 1997
Nebe ho kiak no mukit tebes ba bibi atan sira
Maibe ho ita boot nia tulun no grasa ba diocese ne’e
Bibi atan sira sai buras no wa’in liu tan iha diocese ida ne’e
Ita-bo’ot sai husi diocese hodi ba vizita bibi sira diocese ne’e nian
Husi Baucau, Manatuto, Viqueque no Lautém
Ita-bo’ot hadulas no vizita sira ho grasa indulgência plenária nian
Ne’ebe fo sai kedas husi Kristu nia saseluk Papa Francisco
Atu sira ida-idak halo penitênsia, hakribit sala fiar evanjellu, hodi visita
fatin sira ne’ebe destinadu tiha ona, “Catedral Baucau, Aitara, Ariana, nsst”.
Hodi hetan grasa espesial ida ne’e.
Para hetan perduan espesial husi Nai iha momentu diak ida ne’e
Maibe ho haraik-an no laran triste tebes ami sarani diocese Baucau
Husu ba ita-bo’ot atu haraik bibi atan foun ida mai ami nia diocese Baucau
Atu bele bali fali bibi sira ne’ebe namkari iha municipio haat nia laran
Nune’e ami bele sai metin no forti liu tan iha peregrinasaun mundu ne’e nian
Hodi la’o tuir diresaun ida deit, ba fatin rohan laek nebe determina tiha ona mai ami.
Aman S.Jose aman hakiak nain, protetor diocese Baucau
Harohan daet mai ami oan kiak sira, atu ami bele hetan fali bibi atan ida tuir Nai nia hakarak
Hodi lori bibi sira iha diocese ne’e ba reinu rohan laek nian eternidade. Amen.
By Aldo Jlm’22
Edisaun 16072022