Memoria 20 de maio 2022 iha Luro

Oleh: Aldo Jlm

Governu lokal liu-liu Administrasaun Minisipal Lautém, iha planu atu habelar informasaun dezenvolvimentu nian hodi hakbesik-an ba povu. Tan ne’e inisiativa Administrador Munisipiu Lautém, Sr.Domingos Sávio, hakarak selebrasaun bo’ot nacional sira iha nivel municipal ne’e, halo iha postu administrativu sira, para povu mos bele senti ukun-an iha durante tinan 20 nia laran ne’e duni.

Durante nia mandatu hahu husi 2020, nia halo mudansa lubuk ida ona, hanesan muda vendedores sira nebe fa’an iha loja Lospalos sira nia oin, ba fali Klube e Kuartel Polisia Distrital nia kotuk, taka estrada kuak sira iha munisipiu Lautém, Lospalos vila laran, kompleta estrutura municipal nian, no ikus mai mak halo mudansa selebrasaun eventu nasional sira hanesan 20 de maio no 28 de novembro sira, muda fali ba postu administrativu sira ho rotasaun, hanesan dia 28 novembro 2021 iha postu Lautem/Moru, 20 de maio 2022 iha postu Luro, 28 novembro 2022 sei halao iha Iliomar, no 20 de maio 2023 sei halao tinan oin iha Tutuala.

20 de maio 2022 iha Luro nia rezultadu susesu duni, maski iha failansu uitoan-uitoan maibe nu’udar umanu, ita la se’es husi sala. Hahu halo preparasaun, forma komisaun interinu municipio no postu administrativu Luro, hahu husi dia 25 abril de 2022 ekontru Komisaun Organizadora Municipal iha Administrasaun Munisipiu Lautém, pois kontinua fali iha dia 4 de maio de 2022 kedas, hala’o enkontru ho Komisaun Organizadora 20 de maio nian iha Luro, hamutuk ho Diretor PDIM Sr.Mario Cabral mak ba assisti.

Pois halo tan enkontru ultimo preparasaun iha dia 12 de maio de 2022, hamutuk ho diretor Recurso Umano Sr.Manuel Oliveira, e diretor PDIM Sr.Mario Cabral, atu haree preparasun ikus ba eventu municipal ida ne’e.

Tuir mai dia 17 de maio de 2022, ha’u desloka kedas ba Luro hodi halo preparasaun ikus hamutuk ho elementus treinados hanesan corro içar bandeira no igreja nian, membro corpo hastear bandeira nacional, no toba kedas iha kolega Sr.Delfin Marques nia uma. Maski hau husi Iliomar maibe hau ba Luro hanesan hau nia uma rasik, tamba simu hau ho diak, han hemu no toba iha fatin diak. Loron tuir mai ami halo treinamentu nafatin to’o ikus iha dia 18 de maio loraik. 

Dia 19 de maio de 2022, ami simu Vice Ministro Justiça no Administrador Munisipiu Lautém, hafoin hala’o Selebrasaun Misa ba 20 de maio 2022 nian iha Igreja Nossa Sra.Rainha dos Apostolos, Paroquia Luro nian, hamutuk ho Vice Ministro Justiça, Administrador Munisipiu Lautém, Diretores no Chefe Departementos sira, povu sarani Luro tomak. Momentu ne’e hau mak akompanha toka hamutuk ho Corro Paroquia Luro nian. Depois de missa ami kari aifunan iha jardim herois martires da patria Luro nian, pois tuir mai ami ba visita Suco Lacava hodi haree diretamente fatin SEFORPOL (Sentru Formasaun Politiku) iha tinan 1975 nian wainhira funu hahu iha ailaran. Fila husi ne’eba ami mai fali Luro hodi deskansa maibe kalan hau senti ulun moras no isin manas uitoan, maibe hau hemu aimoruk no hariis ho bee manas nebe diak fila fali.  

Tuir mai iha loron kulminante, dia 20 de maio de 2022, hau ho kolega Sr.Delfim prepara kedas iha uma hafoin matabixu, ami rua tun ba Kampu Luro hodi prepara ba selebrasaun 20 anos, loron bo’ot 20 de maio 2022 nian. Buat hotu la’o diak, grupu kantores no corpo hastear bandeira nacional hotu-hotu mai husi ESG Fernando Lasama Luro nian. Depois de selebra tiha hastear bandeira, sira hala’o tan konviviu hanesan, apresentasaun dansa kultural, tebedai no tebe jeral, mesak furak no rame loos; maibe to’o han meudia nian mak, povu sira hotu mai ataka Komisaun nia aihan ne’ebe prepara ba bainaka sira, taun ami rua ho kolega Delfin desidi hodi fila ba uma han iha neba mak fila ho hau nia pasta, hodi prepara atu fila fali mai iha Lospalos.

Memoria 20 de maio 2022 Luro satisfaz liu mai hau, tamba sira simu hau hanesan nia oan rasik iha nia uma rasik, nune’e hetan tan kolega foun profa Diana nu’udar profa ESG FLS Luro mak sai direjente, no alin Fransisca, Secretaria Administrasaun Postu Luro, mak sai nu’udar MC ou protocol iha dia 20 de maio 2022 nian. Hau nu’udar protocol municipio fo hau nia assitensia makaas ba nia, liu husi treinu leeh leitura MC ho portugues, no ajuda toka iha grupu corro Patria-Patria no Um minuto de silencio nian, no mos ba grupo corro paroquia iha missa de agradesimentu.

Buat hotu la’o tuir planu ne’ebe trasa tiha ona, tamba hau nia orasaun rasik no suporta husi kolega sira, mak halo susesu ba eventu 20 de maio nian iha postu Luro, la hetan sidi ruma iha ne’eba, buat hotu la’o diak, tuir Nai nia hakarak. Tamba antes ne’e hau fuan kiik hela atu ba Luro, maibe ho konfiansa ba Nai, hau ba Luro no fila mai Lospalos ho isin diak nafatin.

Ikus mai iha dia 10 de junho de 2022, ami ekipa Komisaun Organizadora Interinu Minisipal hamutuk ho Diretor Recurso Umanu, Sr.Manuel Oliveira, Diretor PDIM, Sr. Mario Cabral ba fali postu Luro hodi dissolve Komisaun Organizadora ne’e, para pois dia 28 novembro 2022 nian bele hala’o fali iha postu administrativu Iliomar nebe sei mai iha tinan ida ne’e.

Memoria Luro, hau sei haluha o nia diak sira, maski balu-balun laran moras moras ba hau, maibe ho Nai nia espiritu no grasa nebe akompanha nafatin hau, buat hotu la’o ho susesu, tuir Nai nia hakarak. Memoria Luro, o nia diak sira hau sei hakerek nafatin iha hau nia fuan, no o nia aat sira moos sei sai diak tamba Nai nia grasa no espiritu nebe sempre akompanha nafatin ho ha’u, to’o ha’u iis kotu. 

By Aldo Jlm

Edisi, 020822