Iha fatin ida moris avo ida ho nia beioan. Baibain beioan sira gosta ba vizita ba nia avo sira, no nia avo sira trata ho diak hanesan fo hahan, hatais, no halimar ho sira. Maibe avo ida ne’e oin seluk uitoan. Wainhira nia beioan ba vizita nia atu halimar ho nia loron tomak iha nia uma, no senti avo nia domin, avo karak liu ba nia beioan ne’e, karak ba hahan, hatais no halimar.
Nune’e nia beioan be hela ho nia avo ne’e loron ida mate ba hamlaha, pois nia klamar ba lalehan. Iha lalehan ne’eba nia haksolok tebes ho Maromak nia prezensa.
Pois liu tinan ida nia avo mos mate, maibe nia klamar tama ba ahi infernu nian, nia tahan labele. Hafoin nia hakilar ba nia beioan, “beioan o iha ona lalehan karik may ajuda hasai ha’u husi ahi manas ne’e”. Nune’e nia beioan mos ba husu Maromak atu hasai nia avo husi ahi infernu nian. Maromak dehan ba nia, o ba took haree livru moris nian, kona ba o nia avo nia biografia wainhira sei moris iha mundu.
Nia ba tiha loke livru moris nian nee, hetan tiha nia avo nia biografia nebe mesak nakonu ho sala barak hanesan; karakten, hotar, tolok nee deit mak nakonu iha ninia biografia. Nia doko ulun, ooh…ida ne’e mak halo ha’u nia avo tama iha ahi infernu nian. Maibe labarik ne’e husu nafatin ba Maromak atu bele salva nia avo husi ahi infernu nian. Nune’e Maromak hatan ninia pedidu, hodi haruka nia ba foti xavi boot no naruk kuaze metro rihun ida, hodi dehan ba nia, o lori xavi ida ne’e lolo ba infernu laran para o nia avo kaer ida ne’e hodi hasai tiha o nia avo husi ahi infernu nian.
Nune’e labarik ba lori duni xavi boot no naruk ne’e ba lolo iha infernu nia ibun tutun, nia avo komesa lolo liman mai xavi ne’e, hodi sa’e dadaun, maibe ema barak nebe iha infernu laran mos hotu-hotu mai tabele ba ferik ne’e hodi sai husi ahi manas infernu nian. Liu tiha uitoan ba leten, ferik dehan ba sira be mai tabele ba nia, “ha’u nia beioan atu mai salva ha’u laos imi hotu”, taun ferik ne’e doko makaas nia-an, sira nebe belit ka tabele ba ferik ne’e monu hotu fila fali ba ahi infernu laran.
Nune’e nia beioan dehan, “avo lakoi muda avo nia hahalok uluk sei moris iha mundu ne’e hodi karak ba ema seluk no lakoi fahe, taun diak liu avo fila fali deit ba infernu laran; se hakarak mai iha lalehan taun muda avo nia attitude ne’e”. Maibe kuitadu tamba avo ne’e lakoi nafatin taun beioan husik fali nia avo ba ahi inferno nian.
Resumidu:
Historia ne’e hatudu mai ita katak bainhira sei moris iha mundu, labele karak ba ita nia maluk sira, husi matenek no talentu sira nebe ita iha. Maromak fo buat sira ne’e ba ita atu ita fahe ba ita nia kolega sira para hadia nia moris iha mundu ne’e no hakat ba iha mundu seluk.
Por Prof. Aldo Jlm’21