Oleh: Aldo Jlm
Inagurasaun postu Saúde Souro Lospalos ne’e, hala’o iha quinta-feira, dia 28 julho 2022, inagura husi Ministra Saúde Odete Maria Freitas Belo, Embaixador Japan Machame Kinifushi, no Administrador Municipio Lautém, Sr.Domingos Sávio. Inagurasaun ne’e hahu halo preparasaun iha fatin refere, tuku 8.30 kedas, enfermeira sira, povu suco souro sira, no entidades diretores servisu municipal sira no xefe departementos sira, hein kedas ona ministra ho nia komitiva iha fatin neba, to’o tuku 10.30 mak komitiva ministra nian to’o iha fatin refere, simu ho tebedai nebe inan sira husi suco Souro rasik mak prepara.
Posto saúde refere halo husi NGO Hadaste, ho montante orsamentu U$91.000,00 dolares Americano, husi doador governu Japão. Postu ne’e konstrui husi tinan 2020 kedas, no loloos ne’e halao nia inagurasaun iha tinan 2021 maibe tamba covid-19 mak impede ne’e mak foin dia 28 julho 2022 mak inagura.
Iha momentu ne’e Administrador munisipiu Lautém, apela ba embaixador Japão para atu bele ajuda nafatin municipio Lautém hodi konstrui tan posto saúde hanesan ne’e ba suco sira seluk nebe seidauk iha posto saúde. Nune’e povu hotu bele hetan saúde diak. Inklui parteira no enfermeira sira atu bele tulun povu sira ne’ebe moras, tulun inan sira ne’ebe tuur ahi, no atende moras sira seluk tan.
Tuir mai embaixador Japão, Machame Kinifushi, hato’o nia diskursu katak: ”Serbisu hamutuk Timor Leste ho Japão durante tinan 20 nia laran, halo ona postu saúde iha munisipiu sira seluk hamutuk 125 ital, inklui Lautém, Suco Souro, hodi gasta osan miliaun 35$ resin. Japão sempre fo tulun ba povu Timor Leste, liu-liu iha parte saúde hodi hasa’e kualidade saúde povu nian, kresimentu labarik sira nian liu husi vasina, Kuida inan sira nebe tuur ahi iha postu saude ne’e”. Iha futuru oin mai, Japão sei iha komitmentu nafatin atu suporta povu Timor Leste, la’os iha saúde deit maibe iha mos area sira seluk.
Iha sorin seluk Ministra Saúde, Odete Maria Freitas Belo, iha nia palestra dehan katak: politika governu nian mak “Lori saúde besik ba povu hodi la husik ema ida iha kotuk”. Governu iha komitmentu atu halo postu saúde iha suco 34 iha munisipiu Lautem tomak, maibe orsamentu estadu fahe la to’o nafatin, tan ne’e ita buka fali parseiru seluk hodi suporta ita. Dadaun ne’e ita fo agradese wain ba governu Japão nebe ajuda ona ita hodi konstrui postu saúde Souro ne’e, la’os iha municipio Lautém deit maibe hari mos iha municipio sira seluk, hanesan iha Viqueque, Liquisa, Dili, no selu-seluk tan. Tan ne’e husu ba komunidade Suco Souro atu kuida uma ne’e para iha kondisaun diak nafatin, nune’e bele halo tratamentu saúde iha fatin ne’e. Nune’e wainhira imi moras karik lalika ba dook ba liu Lospalos vila. Se karik iha enfermeiru mak menus entaun hato’o lalais ba diretor saúde Lospalos para koloka mediku sira iha ne’e, hodi atende inan sira nebe partus, lori labarik sira mai vasina, no moras sira seluk tan mos bele halo tratamentu iha postu ne’e.
Hafoin halo tiha sira nia palestra mak ba inagura postu saúde Souro, hodi asina plaka, tesi fita no hetan bensa husi amo pároku S.Paulo Lospalos, Pe.Tomas,SDB, depois kontinua ba han meiu dia no fila ba ida-idak nia fatin. Tamba loraik sei iha kontinuasaun halo inagurasaun fatin izolamentu & laboratorio covid-19 iha Hospital Lospalos nian.
By prof EdoSantos’22
Edisi, 300722