Oleh: Aldo Jlm
Husi o nia moris mai iha mundu
Halo hau laran kontenti no ksolok
Nakonu ho domin no grasa
Nebe hau simu husi Nai
Atu ko’us no bali o
Husi kiik to’o boot ohin loron
Loron ohin mak o nia loron ksolok
Be mosu mai iha mundu
Hodi senti mundu nia ksolok no terus
Be o hatudu liu husi o nia hamnasa no tanis
Katak moris ne’e nu’udar prova ida
Ikus mai se mak manan sei hakat ba mundu seluk
Liu husi susar no terus iha funu Timor nian
O mosu mai hanesan anju ida
Nebe fo ksolok ba ami iha funu laran
Hodi fo ksolok ami iha kilat, meik no kroat tutun
Wainhira Timor Leste hala’o referendum
Ohin loron o hakat tan pasu ida
Hodi hakat ba oin hasoru moris ne’e
Nia moruk no midar
Wainhira ita sei dada iis iha mundu ne’e
Mundu ida ne’ebe fo matak malirin no malisan ba ita
Tuir tempu natureza be fo mai ita
Iha tinan ruanulu resin haat liu ba
O mosu mai iha mundu hanesan railakan ida
Ho matan nakloke haree mundu nia iis foun
Liu husi vidru ospital Lospalos nian
O hakilar ba mundu tomak katak o mosu mai ona
Ohin loron o jovem tiha ona
Hodi hakat tan pasu ida ba oin iha o nia moris
Atu bele hasoru laloran moris nian
Nebe sempre doko ita tun sa’e husi moris ne’e rasik
Kesi o-an ba iha Nai, atu o labele mout
Iha laloran mundu nian
O mak maun bo’ot ba o nia alin nain tolu
Hodi bele tau matan no guia sira
Ba dalan diak tuir tempu nebe determinadu
Hodi tuir diresaun ida ne’ebe lo’os no justu
Tuir mata dalan moris ida ne’ebe nakonu ho ksolok
Maski kiak iha isin, maibe riku iha fuan ho domin no grasa Nai nian
Hodi bele hakuak hotu o nia alin sira be la’o tuir hela o
Ita nia moris mak ne’e:
“Moris mak loron ida ohin ne’e
Moris mak lian iha ne’e
Moris mak lalatak husi naroman
Moris mak kalohan be semo
Moris mak mehi kma’an ida
Nebe sei sai fali mahobeen
No hanesan aisuar nebe suar sai
Moris ne’e dura deit iha momentu ida
Kmaan liu hanoin ida
Moris anin ida mak lori
Moris ne’e aitahan ida nebe monu!
Moris mak aifunan iha korenti
Moris mak anin nebe huu neneik
Moris mak fitun nebe monu
Semo kmaan liu hanesan manu
Kalohan be anin huu iha lalehan
Laloran be anin huu iha tasi
Ida liu tiha ida seluk mai fali
Moris – hamonu kastigu
Husi manu liras be kanek
Husi foho ba foho be dudu sa’e ba
Moris ne’e anin mak sei lori”
Iha o nia loron ksolok ohin
Hau laiha presente murak ida hodi oferese ba o
Maibe ho deit harohan oan ne’e ba Nai
Atu o bele hetan vida naruk, saudável nafatin
Hodi luta iha o nia estudu to’o hetan susesu iha loron ida
Tuir tempu ne’ebe determinadu ona
O nia susesu sei sai determinante ba ita hotu nia susesu
Para bele buka moris ida ne’ebe diak liu agora
Iha o nia futuru nebe indeterminadu.
By papy amado, Aldo Jlm’22
Edisi, 10082022