Oleh: Aldo Jlm
Previlegio boot no grasa wain husi Nai leten aas ba mai ita sarani Timor Leste
Ba existensia tinan atus lima fiar kriatisnismu nian
Iha rai doben Timor Lorosa’e
Husi rai kiik Venilale, Na’i hili bibi atan foun
Husi alumni salesiano Don Bosco nebe Nai fihir no hili
Atu sai mahein ba bibi sira be namkari iha igreja universal
Ami povu sarani Timor Lorosa’e rona notisia ne’e
Ho sentimentu ksolok no alegria profunda
Tamba hetan murak mean nebe subar hela iha Timor
Murak mean ne’e subar kleur ona iha existensia fiar sarani nian
Durante tinan atus lima resin nia laran
No tinan ruanulu independensia Timor Leste nian
Mak o foin mosu mai, halo ema hotu hakfodak no haksolok
Mehi ne’e Timor oan barak hein kleur ona
Foin mak reliza iha tinan ida ne’e
Papa Francisco anuncia iha Vaticano iha loron 29 de maio 2022
Iha loron 27 agosto 2022 simu knaar liu husi consistorio
No iha loron 6 de setembro de 2022 hala’o misa agradecimentu iha Tasitolu Dili
Grasa no domin Maromak nian liu husi successor Nai Jesus Kristu
Santo Padre Francisco fo sai iha loron asenção do Senhor
Tamba ho domin no presente kmanek existensia fiar sarani nian
Iha Timor durante tinan atus lima resin liu ba
Maski ami lakon bibi atan diak balun husi Diocese Baucau
D.Basilio do Nascimento ho nia vigario Francisco Pinheiro
Ami hamulak hela hodi hetan bibi atan foun
Maibe realidade hatudu oin seluk, mosu fali notisia foun ho kardeal foun
Ami sarani Timor Leste agradece wain ba Sua Santidade
Papa Francisco nebe ho roman espirito santo nian
Haraik kardeal foun mai ami, atu ami mos involve-an iha igreja universal
Hodi hamutuk lori liafuan diak ksolok envanjellu nian ba ema hotu
Hodi la’o hamutuk tuir bibi atan ida deit Jesus Kristu
Liu husi igreja sinuoidal, la’o hamutuk ba reinu lalehan
Atu ba lalehan ne’e presiza sakrifisiu, pasiensia, harai-an no domin
Halo karidade ba malu, liu husi asaun sosial karitativa
Ami nia parabenz wain ba Reverendissima Eminência
Don Virgilio Cardeal do Carmo da Silva,SDB
Nebe simu ona knaar foun ida ne’e ho responsabilidade
Liu husi konsistoriu hodi simu barete mean no kadeli
Sinal digninadade no domin Maromak nian
Atu involve-an iha senado papal
Don Virgilio Cardeal do Carmo da Silva, SDB
Ita-boot mak murak mean husi total populasaun juta ida resin
Murak mean ida nebe serve hodi hafutar Nai nia altar santu
No serbi Kreda Universal, liu-liu Kreda particular Timor Leste
Ita-boot mak nudar ponte entre Vaticano Roma no Timor Leste
Liu husi ita-boot nia serbisu hamutuk ho cúria papal
Ita Timor Leste mos sei bele hola parte iha desizaun Kreda Universal nian
Hanesan uluk Belem maski kiik, maibe Maromak hili nia sai Nai nia moris fatin
Nune’e mos Timor, maski o rai ida kiik, no foin mak ukun-an,
maibe o mos iha direito atu foti desizaun ba fiar Kreda Universal
nebe agora la’o dadaun husi igreja militante ba purgante no final iha triunfante.
Hodi haksolok hamutuk ho Nai iha Lalehan ksolok rohan laek
Mai ita reza ba ita nia kardeal foun Don Virgilio Cardeal do Carmo da Silva,SDB
Para saudavel nafatin, hodi hala’o nia knaar todan ne’e to’o rohan.
Dala ida tan, mil parabenz ba murak mean Timor Leste
Don Virgilio Cardeal nudar primeiro cardeal Timor Leste
Atu sai naroman no masin iha Timor Leste no Ásia
By Aldo Jlm’22
Edisi, 070922