Oleh: Aldo Jlm
Matenek ne’e hanesan ar nebe nakonu iha mundu, ba hirak nebe prepara fatin hodi hili, simu no rai iha nia kakutak mak sai matenek…,hodi matenek ne’e mak bele dezenvolve ita nia Timor Leste nebe ukun-an ona iha tinan ruanulu nia laran.
Formasaun Multimedia no Media Sosial halo husi CEFTEC nebe hamahan-an iha MAPKOMS mak realiza formasaun ne’e iha Administrasaun Munisipiu Lautém husi loron 12 to’o 16 fulan setembro tinan 2022, hetan rezultadu pozitivu. Maski matéria nebe fo la sufisiente tamba fo deit semana ida deit, maibe buat uitoan nebe ita hetan ona ne’e, hodi halo buat diak ruma ba ita nia rai liu-liu ba ita nia serbisu fatin kada diresaun sei hetan rezultadu nebe pozitivu, hodi fahe no simu informasaun husi sentral mai iha municipio to’o ba posto administrativu sira, sucos no aldeias sira.
CEFTEC (Centro Formação Técnica e Comunicação) nebe hamahan iha MAPCOMS (Ministerio Assuntos Parlamentares Comunicação Sosial), sira iha Unidade no Módulo Walu (8) mak Unidade Komunisaun (Lian tetun Jornalismu, Lian Português Jornalizmu, Relasaun Publiku no Protokolu, Unidade Multimedia no Media Sosial, Unidade Hakerek Imprensa, Unidade Rádio, Udidade Televizaun, Unidade Komunikasaun iha SItuasun Krize) hala’o ona formasaun iha municipio sanulu resin haat, inklui munisipiu Lautém nebe hola parte iha formasaun ne’e, hetan apresiasaun husi Administrador Municipio Lautém, tamba bele fahe informasaun ba atividade hirak nebe hala’o iha municipio Lautém ba media social atu ema barak hatene katak, saida mak funsionarius sira ka makina estadu hala’o iha munisipiu Lautém.
Durante semana ida iha municipio Lautém, partisipantes sira nebe mai husi diresaun oi-oin aprende matéria sira hanesan, oinsa opera kamera ho diak tuir standar ISO nebe iha, hodi hasai filmazem no fotografia, pois halo nia notisia no publika iha media social, liu-liu iha fanpage facebook munisipiu nian atu ema barak bele koinese no hatene atividade sira nebe la’o dadaun iha municipio Lautem.
Iha loron ikus husi partisipantes nain ruanulu resin rua (22) nebe kompostu husi mane nain 17 no feto nain 5, konsege produz filmazen lima (5) ho forma notisia badak ka spot, konaba area oi-oin nebe akontese iha municipio Lautém. Filmajen sira ne’e foka liu ba area; “Formasaun Multimedia no Media Sosial, Preparasaun ba Reuniaun KKT, Disputa Rai, Rehabilitasaun Residensia Administrador, Area Turismu Umunira”. Nia rezultadu publika ona iha fanpage fcebook “Administrasaun Minisipiu Lautém”, hodi ema barak bele asesu, ba informasaun atividade kada diresaun iha Munisipiu Lautém.
Formasaun ne’e hahu loke husi Xefi Ekipa Formasaun Sra.Evangelina Ximenes, hamutuk ho nia formador Marcelino Soares, durante semana ida, pois ensera iha sexta-feira, loron 16 fulan setembro tinan 2022, husi Ministru MapKoms S.E.Francisco Martins da Costa Pereira Jeronimo ho tebe no dansa. Tuir sr. Francisco Martins. Ministru MAPKOMS katak, formasaun ne’e loron 5 deit maibe konsidera hanesan tinan 5 hodi hetan buat ruma imi produz ona iha semana ida ne’e nia laran, tamba kestaun orsamentu, formasaun hanesan ne’e sei hala’o tan iha tinan oin mai ho materia seluk. Buat nebe imi hetan ona bele publika no fo sai publika liu husi fanpage facebook Munisipiu Lautém para ema barak hatene no koinese atividade, produtu no fatin turismu sira nebe iha munisipiu Lautém. Sertifikadu sei simu iha nasional iha primeira semana fulan novembro tinan 2022.
By Aldo Jlm’22
Edisaun, 210922