Loron ne’e loron quinta-feira, dia 27 de maio de 2021, hau senti baruk wainhira hader husi hau nia toba fatin meudia nian. Hau mai hau nia meja sekretariadu hodi loke laptop atu rona hau nia musica favoritu, rona ho hau loke fali file seluk hodi haree mos film favoritu ne’e hamutuk ho musica ne’e dala ida. Hau la senti musica ne’e hotu, maibe hau fokus liu ba film ne’e, ho nia titulu “Miss Dosen dan Mr.Mahasiswa Abadi”.

Iha filmazen ne’e, mahasiswa nebe reprovadu dala rua tiha ona iha ninia Tese, maibe tamba dosente foun nebe foin hotu husi universidade atu mai hanorin iha universidade ne’e. Mahasiswa reprovado ne’e naran “Galy” no docente ne’e nia naran “Riana”. Loron dahuluk dosente ne’e atu hanorin, nia hahu treinu oinsa atu aprensenta-an iha sala laran, iha ninia estudante sira nia oin, nia sei treinu hela iha lagoa ida nia ninin, derepenti mahasiswa si Galy ne’e sa’e motor mai, pois nia travaun la han ona, taun nia aumenta tan gas, to’o nia mai soke kedas dosente nebe treinu hela iha lagoa ninin ne’e. Hafoin Galy monu tiha iha bee laran, ibu dosente Riana hakilar husu ajuda, maibe laiha ema ida mak mai husu ajuda Galy nebe monu hela iha lagoa. Nune’e dosente ibu Riana halai ba bee laran hodi ajuda nia. Husi ajuda ne’e mak mahasiswa Galy laran monu ba ibu dosente Riana nia bonita, hafoin nia dehan, hau mate ona ka? Ibu dosente Riana hatan, o sei moris hela, hamrik ba. Nune’e Galy hamrik husi bee laran mai iha liur hafoin nia dudu deit nia motor to’o iha kampus, pois nia tama iha sala laran ho roupa nebe bokon, nune’e mos ibu dosente Riana ba universidade ne’e, maibe mahasiswa ne’e la hatene katak, ohin be ajuda nia ne’e, ninia dosente foun iha nia universidade. Nune’e dosente katuas ida mai fo avisu ba sira nune’e, ohin materia be hau hanorin ne’e dosente foun ida mak sei hanorin. Nune’e nia bolu kedas ibu dosente Riana, no nia tama kedas sala laran hodi apresenta-an, hanesan ohin nia ensaiu ka treinu tiha ona iha lagoa ninin.

Iha sala laran, wainhira ibu dosente Riana tama hodi aprensenta-an, si mahasiswa Galy mos haksoit husi nia fatin halai ba oin hodi rei ibu dosente ne’e nia liman, hodi dehan “gadis impianku”, agora sai hau nia dosente. Nune’e dosente katuas ne’e dada tiha nia tilun, haruka nia ba fali tuur iha nia fatin. Aula hotu tiha, si mahasiswa Galy duni kedas ibu dosente hodi dehan, komesa agora hau hakarak estuda tamba hetan dosente foun, hau hakarak o sai hau nia profesora privadu deit. Maibe ibu dosente Riana ne’e hatan ho moe-moe nune’e, hau o nia dosente o labele book hau bebeik. Maibe Galy nafatin book nia, to’o ikus mai nia dehan, hau hakarak sai o nia doben segredu deit, tamba o nia tunangan iha ona. Nune’e loro-loron sira antusias hodi buka tempu hasoru malu nafatin iha eskola, liu-liu iha sala laran, iha aredor eskola nian, no mos fo lees private iha lagoa ninin.

Mahasiswa Galy nebe uluk ulun to’os lakoi estuda, agora nia iha estuasismu atu estuda tamba dosente bonita Ibu Riana nebe mai hanorin nia. Iha fatin nebe sira hasoru malu ibu dosente sempre dehan ba nia, o tenke estuda makaas pra o bele passa, tamba ne’e ba o nia futuru laos ba hau. Estudante Galy hanoin nafatin liafuan ne’e hodi estuda makaas, tamba hetan profa privadu ida nebe tau atensaun makaas ba nia katak, tinan ida ne’e o tenki passa. Nune’e nia hakaas-an duni hodi estuda, tan ne’e nia hetan valor diak iha nia exame semester nian.

Iha fatin seluk, wainhira sira nain rua lori malu ba lagoa ninin, dosente ibu Riana ninia doben ka tunangan liu ba hodi haree sira rua nanmora hela iha lagoa ninin, no hasai sira nain rua nia foto. Nune’e loron tuir mai, ibu dosente Riana nia doben lori nia ba pasiar iha fatin fuik ida, mak hatudu no fo foto ne’e ba ibu Riana, nune’e ibu Riana hakodak, pois nia doben tunangan nee siak no hakotu kedas sira nia pertunangan. Nune’e wainhira Galy lori aifuan sira ba ibu Riana nia uma maibe nia aman mak mai loke odamatan, no duni kedas nia. Nune’e nia telefone deit nia doben Rina, mosu husi varanda andar leten mak telefoni malu katak aban mak it’rua hasoru malu deit iha lagoa ninin. Pois loron tuir mai Galy nia apa mos, dehan ba nia oan Galy katak, hau kontenti tamba agora o muda sentu oitenta grau kedas, husi ulun to’os agora sai ulun mamar, tamba profa dosente Riana ne’e. Nune’e nia apa hameno ba nia oan dehan, “feto ne’e forsa duni, hodi hamamar o nia ulun fatuk to’os ne’e to’o agora o iha mudansa boot, maibe keta haluha kata, feto nia forsa bele halo o sai diak, maibe mos sai venenu ba o”.

Nune’e Galy hanoin iha nia laran katak, profa dosente Riana ne’e nia aman mak haruka atu sai nia doben segredu nune’e nia bele estuda hodi finaliza ninia estudu iha universidade, tamba nia reprovado dala rua ona iha universidade to’o tinan neen iha eskola ne’e. Nune’e loron tuir mai wainhira Galy tama ba eskola atu tama sala laran, hanesan bai-bain sira nain rua hasoru malu iha liur hodi koalia ba malu kona ba saida mak sira senti. Galy hakilar ba ibu dosente Riana, maibe Riana la senti buat ida. Nune’e Galy hakotu nia talin domin ba ibu dosente Riana. Loron tuir mai sira hasoru malu hanesan busa no laho.

Maibe to’o ikus mai Galy exame tiha hetan valor “A” no passa tiha, ikus mai nia gradua tiha, mak foin nia apa deklara katak, ita tenki fo agradece ba ibu dosente Riana, tamba ninia esforsu tomak hodi sai tiha o nia doben segredu hodi hanorin o mak agora o gradua tiha ona, no hau fo osan ba nia mos nia lakoi simu. Nune’e Galy arrepende katak nia hanoin sala tiha ona, hodi desliga tiha ibu dosente Riana. Maibe dosente katuas nebe uluk lori ibu Riana tama sala laran ne’e, nia mai informa katak, ibu Riana agora imi buka la hetan ona tamba foin mak nia sai husi eskola atu muda fali ba fatin seluk. Nune’e Galy hola nia motor hodi duni tuir nia, to’o nia finji-an monu iha ibu Riana nia kareta sorin, nune’e ibu Riana ho neon kraik tun husi kareta mai ajuda nia, hodi sira rua dame malu, no festeja nia susesu iha eskola. Pois ikus mai ibu Riana dehan, agora o passa ona o bele lamar hau, maibe Galy simu ho laran funan-funan katak, laos foin mak atu lamar, maibe kaben kedas ho o. Ikus mai sira nain rua haksolok no Galy kous Riana ho kontenti.


Husi istoria filmajen iha leten ne’e, semelante kedas ho ami nia istoria domin nian iha passadu. Istoria domin iha leten, akontese iha universidade entre dosente feto ida ho nia estudante mane ida. Maibe ami nian fali domin ne’e akontese iha Ensino Basiku ida entre professor mane ida naran (Edy) no aluna ida naran (Tari). Domin ne’e mos mosu wainhira aluna Tari ne’e reprovadu, pois nia mos sai mestri foun iha eskola ne’e mak halo nia frustrasaun tamba nia la passa exame nasional iha tinan kotuk. Husi professor foun ne’e nia prezenja mak fo inspirasaun ba Tari hodi kontinua fali ninia estuda iha Ensinu Basiku ne’e, to’o remata.

Estudu no domin ne’e la’o hamutuk iha tinan ida iha eskola refere, nebe ikus mai feto (Tari) ne’e passa iha ninia estudu, no ikus mai sira rua hola malu duni, maibe domin ne’ebe sira rua luta ba lori fali dejastre ba mane ne’e nia-an rasik, tan ne’e nia sempre iha nia posizaun katak, buat saida deit mak mosu mos, nia sempre dehan domin ida ne’e kona ba sira nain rua, laiha ema ida mak bele haketak sira rua nia domin ba malu, maski Maromak mak tun mos sira rua sei la sees husi sira nain rua nia firmeza domin nian.

Iha fatin seluk mosu pro kontra iha sira nain rua nia domin momentu neba, maibbe mane ne’e hakat ba oin nafatin hasoru desafiu boot nebe nia aman rasik mak halo ba nia, no ikus mai nia aman rasik mak hakarak dame fali ho nia oan mane, maibe nia fuan sorin mak rahun tamba domin nebe nia rasik luta, ikus mai sai fali dejastre bo’ot ida mai, tamba feto ida ne’ebe nia hadomi ne’e, husik tiha nia ba fatin dook ida ne’ebe ema nia hanoin la to’o no la kona ba nia. Ikus mai mane frustradu lao mesak iha fatin nebe deit nia hakarak, maibe feto nia lalatak sempre tuir nafatin nia, hanesan anju da guarda ida nebe nunka husik nia, to’o ikus nia hatudu fali nia troka ba hola malu fali ho mane ne’e mak, nia moris diak uitoan to’o ohin loron.

By E. Santos’21

(Visited 48 times, 1 visits today)

Tinggalkan Balasan

Alamat email Anda tidak akan dipublikasikan.

Situs ini menggunakan Akismet untuk mengurangi spam. Pelajari bagaimana data komentar Anda diproses.

%d blogger menyukai ini: