𝗛𝗮’𝘂 𝗕𝗮

Moris ne’e hanesan rotasaun mundu nian ne’ebé la sukat ho distansia.
Moris ne’e hanesan laloran tasi ne’ebé nunka sukat nia distansia husi viagem nia mahelik.

Moris ne’e hanesan misteiru ida ó tenké halao, basá realidade ne’e sei la ses husi kosar we’en.

Husi ain nia hakat ba futuru nia bolu, ba loron ida hau sei hakat fila basá Timor iha ha’u fuan.

Ha’u Bá
Lao tan ó Timor
Husik hela ó
Lao Lemo-rai
La haluhan ó ha’u rai
Tan rai ne’e hau nian
Nain mak hau
O iha hau fuan
Laos liafuan deit
Tan hau moris husi ó
Maté mos ho ó

Tan rai ne’e nia dezenvolvimentu ohin hau lao lemorai iha ema rai.
Maské ó hau rai maibé hau sei la husu ba ó hodi la’o lemo-rai iha ema rain tan hakarak halo diak ba ó maské hau at iha ema seluk nia matan.

Necesidadé obriga ha’u tenke husik ó hau rain
Maibé laos haluhan ó.

Tan deit hau sai dezempregu ohin hau husik ó hodi sai empregu iha ema rain.

Hau sei la rekere hau nia esforsu ba ó hau rain, tan rai ne’e nia nain sura no konta mos ho ha’u.

Lao la sukat distansia maské laiha kuitansia tan hakarak esforsu ba ó

Maské diferente ambiente maibé la muda hau domin ba ó hau doben Timor-Leste